Avtor staťi/Автор статї: Natalija Hrebikova/Наталія Гребікова

Okruhlŷj stil Rusyniv Sloveňska (OSRS) spojuje predstaviteľiv rusyňskŷch organizacij, starostiv sel i aktivistiv v oblasty rusyňskoho ruchu na Sloveňsku. Rik 2020 vŷholosyly za Rik rusyňskoho sela a v ramkach ňoho pryhotovyv aktivitŷ, do kotrŷch choče zapojity šŷroku verejnosť i spopularizovaty menšŷ ci vekšŷ sela, de žŷjuť členove rusyňskoj narodnostnoj menšŷnŷ. Aktualno prochodyť vŷtvarne zmahaňa pro ďity i zmahaňa o najkrasšu fotografiju rusyňskoho sela.

Logo Roku rusyňskoho sela 2020

Vŷtvarne zmahaňa pro ďity

Do 15. novembra 2020 majuť ďity mater’skŷch škol i škoľar’i osnovnŷch škol možnosť zapojity s’a do vŷtvarnoho zmahaňa. Pravi poserednyctvom umelec’koj tvor’bŷ chočeme motivovaty i našŷch najmenšŷch a pozitivno jich inšpirovaty ku tomu, žebŷ vŷrazyly svoje odnošiňa i čuťa ku rusyňskomu narodu a usvidomyly si svoji kor’iňa. Ďity s’a možuť do zmahaňa zapojity v ramkach mater’skŷch i osnovnŷch škol, kotrŷ navščivľajuť.

U svojich vŷtvarnŷch robotach možuť ľubovoľnov technikov zobrazyty, jak vyďať rusyňske selo. Prezentovaty možuť pryrodnŷ, hmotnŷ ci istoričnŷ pamjatkŷ i interesnosty vŷbranoho sela, no jednak i emociji a ľudej – rodičiv, sorodync’iv ci starŷch rodičiv. Prosto dašto, što s’a jim bezposeredno spojuje z rusyňskŷm selom.

Vŷtvarne zmahaňa s’a odbŷvať v tr’och vikovŷch kategorijach i tr’och etapach – škoľske, okresne i c’ilosloveňske kolo. Do c’ilosloveňskoho kola postupľať try robotŷ z každoj kategoriji z každoho okresu. R’išyty o viťaznŷch robotach bude tryčlenna odborna porota v zložiňu: Andrij Smolak, Anna Gajova i Marcela Ruňanynova. Avtorŷ viťaznŷch robot buduť odminenŷ vecnŷma c’inamy, no ďiťskŷ ďilka buduť zarivno prezentovanŷ i verejnosty. Viťaziv vŷtvarnoho zmahaňa pro ďity spozname 7. decembra 2020.

Rusyňske selo objektivom fotoaparatu

Druha aktivita prochodyť proťahom c’iloho roka – zmahaňa pro ľubiteľiv fotografiji – profesionaliv i amateriv. Zmahaňa o najkrasšu fotografiju rusyňskoho sela mať podobne poslaňa jak vŷtvarne zmahaňa pro ďity, a to popularizovaty rusyňskŷ sela, motivovaty Rusyniv, žebŷ s’a pryholosyly ku svojim kor’iňom i bŷly hordŷ na svij narod. Zmahaňa s’a odbŷvať v štyr’och etapach, a to jar’, ľito, os’iň i zyma.

Aktualno s’a ľude možuť zapojity do treťoj etapŷ i pryholosyty do zmahaňa fotografiji z motivom oseny čerez i-mejlovu adresu: fotosutaz@rusyny.org. Jeden zmahateľ može do jednoj etapŷ poslaty najvece 3 fotografiji do 30. oktobra 2020. Nasľidno bude pryhološenŷ fotografiji hodnotyty odborna porota, kotra do velykoho finale posune try najľipšŷ z nych. Jedna fotografija postupyť do finale na osnovi verejnoho holosovaňa ľudej na storinc’i na socialnij s’iťi Fejzbuk. Rezultatŷ c’iloročnoho zmahaňa o najkrasšu fotografiju rusyňskoho sela spozname 19. februara 2021.

Selo Šambron, avtorka fotografiji: Katarína Ščigulinska

Rusyňske selo objektivom fotoaparatu

Ne lem takŷma aktivitamy s’a Okruhlŷj stil Rusyniv Sloveňska pryhotovľuje na kampaň ku nadchoďačomu zrachovaňu žŷteľiv, domiv i kvarteľiv, kotre nas čekať v roc’i 2021. Poserednyctvom prostoho, ale mnohoznačnoho odkazu SЬME RUSYNŶ, kotrŷj s’a bude od oktobra v riznŷch formach objavovaty v medijach, choče Rusyniv na Sloveňsku motivovaty, žebŷ si pry zrachovaňu žŷteľstva zapysaly rusyňsku narodnosť, rusyňskŷj materyňskŷj jazŷk i grekokatolyc’ku ci pravoslavnu viru. Avtorŷ kampany choťať prezentovaty ne lem znamŷ rusyňskŷ osobnosty, ale i obŷčajnŷch ľudej, pro kotrŷch bŷty Rusynom je dašto pryrodne a hordo s’a ku svojim kor’iňam pryholos’ať i verejňi.

Vece informacij o aktivitach OSRS najdete na FB sajťi: Rusynŷ na Slovakiji ci vebi: www.okruhly-stol.sk

Русиньске село очами дїтей і обєктівом фотоапарату

Округлый стіл Русинів Словеньска (ОСРС) споює представітелїв русиньскых орґанізацій, старостів сел і актівістів в области русиньского руху на Словеньску. Рік 2020 выголосили за Рік русиньского села а в рамках нёго приготовив актівіты, до котрых хоче запоїти шыроку верейность і спопуларізовати меншы ці векшы села, де жыють членове русиньской народностной меншыны. Актуално  проходить вытварне змаганя про дїти і змаганя о найкрасшу фотоґрафію русиньского села.

Selo Osturňa, avtor fotografiji: Jan Saloň

Вытварне змаганя про дїти

До 15. новембра 2020 мають дїти матерьскых школ і школярї основных школ можность запоїти ся до вытварного змаганя. Праві посередництвом умелецькой творьбы хочеме мотівовати і нашых найменшых а позітівно їх іншпіровати ку тому, жебы выразили свoє одношіня і чутя ку русиньскому народу а усвідомили сі свої корїня. Дїти ся можуть до змаганя запоїти в рамках матерьскых і основных школ, котры навщівляють.

У своїх вытварных роботах можуть любовольнов техніков зобразити, як видять русиньске село. Презентовати можуть природны, гмотны ці історічны памяткы і інтересности выбраного села, но єднак і емоції а людей – родічів, сородинцїв ці старых родічів. Просто дашто, што ся їм безпосередно споює з русиньскым селом.

Вытварне змаганя ся одбывать в трёх віковых катеґоріях і трёх етапах – школьске, окресне і цїлословеньске коло. До цїлословеньского кола поступлять три роботы з каждой катеґорії з каждого окресу. Рїшити о вітязных роботах буде тричленна одборна порота в зложіню: Андрій Смолак, Анна Ґаёва і Марцела Рунянинова. Авторы вітязных робот будуть одмінены вецныма цїнами, но дїтьскы дїлка будуть зарівно презентованы і верейности. Вiтязів вытварного змаганя про дїти спознаме 7. децембра 2020.

Русиньске село обєктівом фотоапарату

Друга актівіта проходить протягом цїлого рока – змаганя про любітелїв фотоґрафії – професіоналів і аматерів. Змаганя о найкрасшу фотоґрафію русиньского села мать подобне посланя як вытварне змаганя про дїти, а то популарізовати русиньскы села, мотівовати Русинів, жебы ся приголосили ку своїм корїнём і были горды на свій народ. Змаганя ся одбывать в штирёх етапах,  а то ярь, лїто, осїнь і зима.

Актуално ся люде можуть запоїти до третёй етапы і приголосити до змаганя фотоґрафії з мотівом осени через і-мейлову адресу: fotosutaz@rusyny.org. Єден змагатель може до єдной етапы послати найвеце 3 фотоґрафії до 30. октобра 2020. Наслїдно буде приголошены фотоґрафії годнотити одборна порота, котра до великого фінале посуне три найлїпшы з них. Єдна фотоґрафія поступить до фінале на основі верейного голосованя людей на сторінцї на соціaлній сїтї Фейзбук. Резултаты цїлорочного змаганя о найкрасшу фотоґрафію русиньского села спознаме 19. фебруара 2021.

Приправа на зрахованя жытелїв 2021

Не лем такыма актівітами ся Округлый стіл Русинів Словеньска приготовлює на кампань ку надходячому зрахованю жытелїв, домів і квартелїв, котре нас чекать в роцї 2021. Посередництвом простого, але многозначного одказу СЬМЕ РУСИНЫ, котрый ся буде од октобра в різных формах обявовати в медіях, хоче Русинів на Словеньску мотівовати, жебы сі при зрахованю жытельства записали русиньску народность, русиньскый материньскый язык і ґрекокатолицьку ці православну віру. Авторы кампани хотять презентовати не лем знамы русиньскы особности, але і обычайных людей, про котрых быти Русином є дашто природне а гордо ся ку своїм корїням приголосять і верейнї.

Веце інформацій о актівітах ОСРС найдете на ФБ сайтї: Русины на Словакії ці вебі: www.okruhly-stol.sk