Avtor: Anna Zamutovska / Автор: Анна Замутовска

Vivtorok 19-ho marca 2024 odbŷv s’a 1. ričnyk pingpongovoho turnaja na internatach Jedlikova v Košŷc’ach.

Midži aktivitŷ O.Z. molodŷ.Rusynŷ patriť okrim organizovaňa kulturnŷch, osvitovŷch i religijnŷch poďij, i organizovaňa riznŷch športovŷch ci turističnŷch aktivnostej. Združiňa dakiľko rokiv organizovalo popularnŷj fotbalovŷj turnaj Rusyn Cup, kotrŷj mav i midžinarodnu učasť. A doteper’ organizuje spoločne turistične putovaňa pid nazvov Po sľiďach Rusyňiv.

Tot rik ku aktivitam prybŷl i 1. pingpongovŷj turnaj, kotrŷj bŷv nelem pro študenťiv a nelem pro Rusyňiv, ale pro všŷtkŷch nadchnenciv toho športu. Učasť bralo dovjedna12 hračiv, kotrŷ bŷly rozďilenŷ do grup. Do vyraďovacoj fazŷ postupyly najľipšŷ dvoje z každoj grupŷ. Turnaj vŷhrav Kristián Šoltys, ktorŷj vo finale porazyv v pomiry 3:0 na setŷ Jakuba Šudíka. Treťij skinčyv Slavomír Štucka. Najľipšŷ hrači turnaja odnesly sobi interesnŷ cinŷ. Serdečno gratulujeme!

Organizačno o poďiju postar’aly s’a členove združiňa Miroslav Imrich, Filip Imrich i Maftej Dopirjak. Ďakujeme všŷtkŷm učastnykam, organizatorom i navščivnykam poďiji i ťišŷme sja na ďalšŷj rik.

1. РІЧНИК РУСИН ПОНҐ-У

Вівторок 19-ого марца 2024 одбыв ся 1. річник пінґпонґового турная на інтернатах Єдлікова в Кошыцах. 

Міджі актівіты О.З. молоды.Русины патріть окрім орґанізованя културных, освітовых і реліґійных подїй, і орґанізованя різных шпортовых ці турістічных актівностей. Здружіня дакілько років орґанізовало популарный фотбаловый турнай Rusyn Cup, котрый мав і міджінародну участь. А дотеперь орґанізує сполочне турістічне путованя під назвов По слїдях Русинїв.

Тот рік ку актівітам прибыл і 1. пінґпонґовый турнай, котрый быв нелем про штудентїв а нелем про Русинїв, але про вшыткых надхненців того шпорту. Участь брало довєдна 12 грачів, котры были роздїлены до ґруп. До вирадёвацой фазы поступили найлїпшы двоє з каждой ґрупы. Турнай выграв Кристян Шолтис, кторый во фінале поразив в поміри 3:0 на сеты Якуба Шудика. Третїй скінчив Славомр Штуцка. Найлїпшы грачі турная однесли собі інтересны ціны. Сердечно ґратулуєме!

Орґанізачно о подїю постаряли ся членове здружіня Мірослав Iмріх, Філіп Iмріх і Мафтей Допіряк. Дякуєме вшыткым участникам, орґанізатором і навщівникам подїї і тїшыме ся на дялшый рік.