Avtor: Anna Zamutovska / Автор: Анна Замутовска

Naše O.Z. maje svoju vlastnu mobilnu aplikaciju z jednakov nazvov molodŷ.Rusynŷ, kotru zrobiv jeden iz našŷch čleňiv i bŷvšŷj predseda O.Z. molodŷ.Rusynŷ Petro Jarinčik.

Mobilna aplikacija pro operačnu sistemu Android funguje od 2017-ho roku i mož jej voľni sťahnuty čerez Google Play. V aplikaciji nachodiť s’a dakiľko praktičnŷch funkcionalostej, kotrŷ možete maty vse poruci. Napryklad spivnyk (nelem) rusyňskŷch spivanok, rusyňskŷj alfavit i slovnyk, interesnŷ tipŷ na čitaňa, no i kalendarijum – grigorijanskŷj kalendar’ pryrŷchtovanŷj u spivpraci z Obščestvom sv. Joana Krestyteľa (OSJK), a tŷž informaciji o našŷch podijach.

U 2022-im roci bŷla dostupnosť aplikaciji rozšŷrena už i pro operačnu sistemu iOS. Keď mate mobilne zar’adžiňa z tov operačnov sistemov, aplikaciju sobi možete bezplatno sťahnuty čerez App Store.

Tot rik s’a aplikacija rozšŷryla i o novu funkcionalnosť, kotra tak samo je rezultatom našoj spivpraci z OSJK. Programom obščestva je religijne, ale i narodne a kulturne vzrostaňa Rusyniv. Medži aktivnosty obščestva naležŷť i vŷdavaňa časopysu Artos, kotrŷj vŷchodyť jak kvartalnyk.

Nova funkcionalnosť v našij aplikaciji sprystupňuje online verziju časopysu. Tak samo obs’ahuje informaciji o možlyvosty objidnaňa časopysu v drukovanij podobi. Do Artosu pyšuť stati i členove O.Z. molodŷ.Rusynŷ. V aktualnim vŷdaňu 4/2023 možete sobi pročitaty interesnŷ stati od Annŷ Zamutovskoj i Mafteja Dopir’aka.

РОЗШЫРИЛИ СЬМЕ МОБІЛНУ АПЛІКАЦІЮ

Наше О.З. має свою властну мобілну аплікацію з єднаков назвов молоды.Русины, котру зробів єден із нашых членїв і бывшый председа О.З. молоды.Русины Петро Ярінчік.

Мобілна аплікація про операчну сістему Android фунґує од 2017-го року і мож єй вольні стягнути через Google Play. В аплікації находіть ся дакілько практічных функціоналостей, котры можете мати все поруці. Наприклад співник (нелем) русиньскых співанок, русиньскый алфавіт і словник, інтересны тіпы на чітаня, но і календаріюм – ґріґоріянскый календарь прирыхтованый у співпраці з Обществом св. Йоана Крестителя (ОСЙК), а тыж інформації о нашых подiях.

У 2022-ім році была доступность аплікації розшырена уж і про операчну сістему іOS. Кедь мате мобілне заряджіня з тов операчнов сістемов, аплікацію  собі можете безплатно стягнути через App Store.

Тот рік ся аплікація розшырила і о нову функціоналность, котра так само є резултатом нашой співпраці з ОСЙК. Проґрамом общества є реліґійне, але і народне а културне взростаня Русинiв. Меджі актівности общества належыть і выдаваня часопису Артос, котрый выходить як кварталник.

Нова функціоналность в нашій аплікації сприступнює онліне верзію часопису. Так само обсягує інформації о можливости обїднаня часопису в друкованій подобі. До Артосу пишуть статi і членове О.З. молоды.Русины. В актуалнім выданю 4/2023 можете собі прочітати інтересны статi од Анны Замутовской і Мафтея Допіряка.

Staťa bŷla publikovana u Narodnŷch novynkach infoRUSYN, č. 9/2023.
Статя была публікована y Народных новинках інфоРУСИН, ч. 9/2023.