Avtor: Anna Zamutovska / Автор: Анна Замутовска

Prypovidkŷ neoddilyteľno naležať ku ditynstu. Tak jak technologiji neoddilyteľno naležať ku dnešnij dobi. Seriju des’aťoch CD Rusyňskŷ prypovidkŷ vŷdalo O.Z. molodŷ.Rusynŷ išči skoriše. Počas ostatnich tr’och rokiv ku nym prybŷly i avdiovizualnŷ prypovidkŷ.

Avtorom dumkŷ i projektu pid nazvov Animovani i po rusyňskŷ je člen O.Z. molodŷ.Rusynŷ Petro Jarinčik. Ideja pryblyžŷty diťam rusyňskŷ prypovidkŷ v modernij animovanij podobi u ňoho vŷnykla avtomatično po osnovaňu svojoj vlasntoj rodynkŷ.

V rokach 2022 až 2024 distaly avdiovizualnu formu prypovidkŷ z už spomynanŷch CD Slon i mŷška, Jak s’a sŷn naučiv piňazi zarabľaty, Anheliv darunok i Nepotribna chmarka.

Ostatňa spomynana prypovidka vŷnykla na osnovi motivu Erikŷ Kosťovoj, za dramarugijov i režijov stojiť Jana Truščiňska-Syva, za muzykov i zvukom Vladyslav Syvŷj. Prypovidku Nepotribna chmarka načitav Mychal Kucer.

Jednako jak v poperednich tr’och prypadach, animovanu podobu  distala i tota prypovidka vďaka skušenomu animatorovy, ilustratorovy i grafičnomu dizajnerovy Janovy Ivanovy.

Za slovamy osnovateľa projektu Petra Jarinčika suť dnes’ dity štodeň v kontakti z modernŷma technologijamy i rodiči avtomatično puščajuť diťam animovanŷ prypovidkŷ, ci na slovac’kŷm jazŷku abo na inšŷch jazŷkach.

„Ciľom projektu je pryblyžŷty s’a holovno menšŷm ditočkam, i takŷm sposobom u nych pidpor’ovaty i rozvyvaty rusyňskŷj jazŷk i narodnostnu identitu‟, poviv Petro Jarinčik. Animovanŷ prypovidkŷ mož posmotryty na YouTube na tim motuzku.

Projekt Animovani i po rusyňskŷ bŷv realizovanŷj z finančnov pidporov Fondu pro pidporu kulturŷ narodnostnŷch menšŷn.

Staťa “Animovanŷma prypovidkamy blyže ku diťam” bŷla publikovana na www.lem.fm dňa 9.1.2025.

АНІМОВАНЫМА ПРИПОВІДКАМИ БЛИЖЕ КУ ДІТЯМ

Приповідкы неодділительно належать ку дітинсту. Так як технолоґії неодділительно належать ку днешній добі. Серію десятьох ЦД Русиньскы приповідкы выдало О.З. молоды.Русины іщі скоріше. Почас остатніх трьох років ку ним прибыли і авдіовізуалны приповідкы.

Автором думкы і проєкту під назвов Анімованi i по русиньскы є член О.З. молоды.Русины Петро Ярінчік. Ідея приближыти дітям русиньскы приповідкы в модерній анімованій подобі у нього выникла автоматічно по основаню свойой власнтой родинкы.

В роках 2022 аж 2024 дістали авдіовізуалну форму приповідкы з уж споминаных ЦД Слон і мышка, Як ся сын научів пінязі зарабляти, Ангелів дарунок i Непотрібна хмарка.

Остатня споминана приповідка выникла на основі мотіву Ерікы Костьовой, за драмаруґійов і режійов стоїть Яна Трущіньска-Сива, за музиков і звуком Владислав Сивый. Приповідку Непотрібна хмарка начітав Михал Куцер.

Єднако як в попередніх трьох припадах, анімовану подобу  дістала і тота приповідка вдяка скушеному аніматорови, ілустраторови і ґрафічному дізайнерови Янови Іванови.

За словами основателя проєкту Петра Ярінчіка суть днесь діти штодень в контакті з модерныма технолоґіями і родічі автоматічно пущають дітям анімованы приповідкы, ці на словацькым языку або на іншых языках.

„Цільом проєкту є приближыти ся головно меншым діточкам, і такым способом у них підпорьовати і розвивати русиньскый язык і народностну ідентіту‟, повів Петро Ярінчік. Анімованы приповідкы мож посмотрити на YouTube на тім мотузку.

Проєкт Анімованi i по русиньскы быв реалізованый з фінанчнов підпоров Фонду про підпору културы народностных меншын.

Статя “Анімованыма приповідками ближе ку дітям” была публікована на www.lem.fm дня 9.1.2025.