Avtor: Anna Zamutovska / Автор: Анна Замутовска

Toho roku, točno 18. novembra 2023, uplŷnulo 15 rokiv od oficialnoj registraciji našoho O.Z. molodŷ.Rusynŷ na Ministerstvi vnutrišňich ďil SR. No sformovaly s’me s’a o rik skoriše – v 2007-im roci na 1. opikačci na Partizanskoj luci v Braťislavi. Jeden rik s’me činyly pid Združiňom inteligenciji Rusyňiv Sloveňska a od roku 2008 ďijame jak samostatna organizacija. Združiňa bŷlo u svojich počatkach prŷjate za kolektivnoho člena Rusyňskoj obrodŷ na Sloveňsku, neskirše i za člena Svitovoho forumu rusyňskoj molodežy i člena Okruholo stola Rusyňiv Sloveňska. No što pro nas dospravdŷ značiť bŷty molodŷma Rusynami?

“Dnes’ s’a molodŷm barz ťažko žŷje. Dnes’ to majuť molodŷ barz lehke. Dnes’ majuť molodŷ barz mnoho možnostej. Jak mŷ s’me bŷli molodŷ, bŷlo to inše…” Teorij jesť povno, uhľiv nahľadu išči vece. No jedno je iste – každŷj s’me molodŷj lem raz. Dakotrŷ už bŷly i obertajuť s’a za tŷm časom jak za najkrasšŷm. Dakotrŷ išči lem buduť, a jich očekovaňa na tot udajno najkrasšŷj vik vse vzrostajuť. Ci bŷv, bude abo pravi je čas molodosty najkrasšŷm vse zaležŷť od každoho z nas. Pryjimaty dobrŷ rišiňa pry kažďim ďili, slovi i dumci. Pryjimaty dobrŷ rišiňa do čoho investujeme čas i energiju svojoj molodosty.

A jakŷ suť nahľadŷ na to bŷty Rusynom? Tak samo rozmajitŷ. No i tu možeme najty jednu istotu – slobodu. Slobodno s’a dnes’ možeme holosyty ku svojij narodnosty. Z toj perspektivŷ i z perspektivŷ možnostej, kotrŷ dnešňa doba nukať, možeme povisty, že teper’ je doba pozitivno naklonena narodnostnomu usvidomľiňu. Bŷty Rusynom je tak samo i o individualňim r’išiňu každoho jednoho z nas usvidomyty sobi svoji koriňa.

Mŷ v O.Z. molodŷ.Rusynŷ s’me pryjaly rišiňa, že chočeme investovaty našu molodu energiju i čer’paty z možnostej, kotrŷ dnes’ mame. Naša organizacija oslavyla 15. juvilej. Medži ľuďmi je to taka teoretična vikova hranic’a, koly končiť ďitynstvo i začinať s’a molodosť, kotroj mož povisty sinonimami suť i sloboda, možnosť ci energija.

Za 15 rokiv zorganizovaly s’me množestvo poďij, vŷdaly s’me vlastnŷ publikaciji i CD, pid našŷm O.Z. vŷnykuv uspišnŷj Folklornŷj kolektiv Ruthenija i perše rusyňske internetove radio na Sloveňsku rusynFM. V našŷch r’adoch za cilŷj čas vŷčer’alo s’a množestvo šŷkovnŷch molodŷch ľudej, kotrŷ ďijaly v okremŷch organizačnŷch jedincoch (Bratislava, Košŷci, Nitra, Stara Ľubovňa, Pr’ašiv, Ihľanŷ), kotrŷ svoji interesnŷ dumkŷ pereminyly na uspišnŷ projektŷ i kotrŷ zaslužŷly s’a i o rozvivaňa rusyňskoho narodnostnoho ruchu nazad u svojich domašňich regionach v kažďij sferi – v kulturi, prosviťi i religiji. Nadale rozumno investujeme svij voľnŷj čas i energiju, chosnujeme možnosťi dnešňoj dobŷ pro rozvyvaňa rusyňskoho narodnostnoho ruchu i svojoho osobnostnoho vzrostaňa.

Jak to vyďat našŷ členove?

“Čuťa, že dagde naležŷš. Radosť iz vzajemnoho pidkripľaňa i rozvyvaňa. Smilosť holosyty s’a ku svojij narodnosty i religiji. Grupa šŷkovnŷch i hordŷch molodŷch ľudej. Posuvaňa s’a doperedu v mnohŷch oblasťach. Motivovaňa, povzbudžovaňa, stričavaňa s’a i zabavľaňa dovjedna. Radosť, hordosť, koriňa, cer’kov, jazŷk, pisňa, kamaraťa, aktivita, žŷvot,…”

Toto pro nas značiť bŷty molodŷma Rusynamy.

Ďakujeme všŷtkŷm našŷm pidporovateľom, žŷčlyvc’om, Vašej pidpory vo formi 2% z daňi i finančnoj pidpory z Fondu na pidporu kulturŷ narodnostnŷch menšŷn, že možeme realizovaty s’a. Samosobov velyka poďaka patriť našŷm tr’om doteperišňim predsedom – Petrovi Štefaňakovi, Petrovi Jarinčikovi i Marekovi Hrebikovi, že uspišňi dovely naše združiňa do 2023-oho roku.

Viryme, že našŷ r’adŷ buduť s’a rozrostaty i budeme hodny nadale pryspivaty v oblasty rozvytku rusyňskoj narodnostnoj menšynŷ.

НАШЕ О.З. МОЛОДЫ.РУСИНЫ СВЯТКОВАЛО СВІЙ 15. ЮВІЛЕЙ

Того року, точно 18. новембра 2023, уплынуло 15 років од офіціалной реґістрації нашого О.З. молоды.Русины на Міністерстві внутрішнїх дїл СР. Но сформовали сьме ся о рік скоріше – в 2007-ім році на 1. опікачці на Партізанской луці в Братїславі. Єден рік сьме чінили під Здружінём інтеліґенції Русинїв Словеньска а од року 2008 дїяме як самостатна орґанізація. Здружіня было у своїх початках прыяте за колектівного члена Русиньской оброды на Словеньску, нескірше і за члена Світового форуму русиньской молодежи і члена Округоло стола Русинїв Словеньска. Но што про нас досправды значіть быти молодыма Русинамі?

“Днесь ся молодым барз тяжко жыє. Днесь то мають молоды барз легке. Днесь мають молоды барз много можностей. Як мы сьме былі молоды, было то інше…” Теорій єсть повно, углїв нагляду іщі веце. Но єдно є істе – каждый сьме молодый лем раз. Дакотры уж были і обертають ся за тым часом як за найкрасшым. Дакотры іщі лем будуть, а їх очекованя на тот удайно найкрасшый вік все взростають. Ці быв, буде або праві є час молодости найкрасшым все залежыть од каждого з нас. Приїмати добры рішіня при каждїм дїлi, слові і думці. Приїмати добры рішіня до чого інвестуєме час і енерґію своёй молодости.

А якы суть нагляды на то быти Русином? Так само розмаїты. Но і ту можеме найти єдну істоту – слободу. Слободно ся днесь можеме голосити ку своїй народности. З той перспектівы і з перспектівы можностей, котры днешня доба нукать, можеме повісти, же теперь є доба позітівно наклонена народностному усвідомлїню. Быти Русином є так само і о індівідуалнїм рїшіню каждого єдного з нас усвідомити собі свої коріня.

Мы в О.З. молоды.Русины сьме прияли рішіня, же хочеме інвестовати нашу молоду енерґію і черьпати з можностей, котры днесь маме. Наша орґанізація ославила 15. ювілей. Меджі людьмі є то така теоретічна вікова граніця, коли кончіть дїтинство і зачінать ся молодость, котрой мож повісти сінонімамі суть і слобода, можность ці енерґія.

За 15 років зорґанізовали сьме множество подїй, выдали сьме властны публікації і ЦД, під нашым О.З. выникув успішный Фолклорный колектів Рутенія і перше русиньске інтернетове радіо на Словеньску русинФМ. В нашых рядох за цілый час вычеряло ся множество шыкoвных молодых людей, котры дїяли в окремых орґанізачных єдінцох (Братіслава, Кошыці, Нітра, Стара Любовня, Пряшів, Iгляны), котры свої інтересны думкы перемінили на успішны проєкты і котры заслужыли ся і о розвіваня русиньского народностного руху назад у своїх домашнїх реґіонах в каждїй сфері – в културі, просвітї і реліґії. Надале розумно інвестуєме свій вольный час і енерґію, хоснуєме можностї днешньoй добы про розвиваня русиньского народностного руху і своёго особностного взростаня.

Як то видят нашы членове?

“Чутя, же даґде належыш. Радость із взаємного підкріпляня і розвиваня. Смілость голосити ся ку своїй народности і реліґії. Ґрупа шыковных і гордых молодых людей. Посуваня ся допереду в многых областях. Мотівованя, повзбуджованя, стрічаваня ся і забавляня довєдна. Радость, гордость, коріня, церьков, язык, пісня, камаратя, актівіта, жывот,…”

Тото про нас значіть быти молодыма Русинами.

Дякуєме вшыткым нашым підпорователём, жычливцьом, Вашей підпори во формі 2% з данї і фінанчной підпори з Фонду на підпору културы народностных меншын, же можеме реалізовати ся. Самособов велика подяка патріть нашым трьом дотеперішнїм председом – Петрові Штефанякові, Петрові Ярінчікові і Марекові Гребікові, же успішнї довели наше здружіня до 2023-oгo року.

Віриме, же нашы ряды будуть ся розростати і будеме годни надале приспівати в области розвитку русиньской народностной меншины.

Staťa bŷla častočno publikovana u Grekokatolyc’kŷm rusyňskŷm kalendar’u 2024 i u Narodnŷch novynkach infoRUSYN, č. 22/2023.
Статя была часточно публікована у Ґрекокатолицькым русиньскым календарy 2024 і у Народных новинках інфоРУСИН, ч. 22/2023.