Avtor: Anna Zamutovska / Автор: Анна Замутовска

Pered paru rokami vŷdalo O.Z. molodŷ.Rusynŷ kompletnu zbirku des’aťoch CD z rusyňskŷma prypovidkami, zozberanŷma po rusyňskŷch selach. Dakotrŷ z nych suť už i v animovanij pobodi.

Rozvyvaty rusyňskŷj jazŷk i vesty dity ku kulturi je potribne už od rannoho ďitynstva. Ďity samosobov inklinujuť ku prypovidkam, i mnohŷ z nych sobi pamjatajuť až do dorosloho viku. Dnes’ suť ďity v každodennim kontakti z modernŷma technologijami, i pozeraňa animovanŷch prypovidok stavať s’a časťov jich štodennoj rutinŷ. I jakraz animovanŷ prypovidkŷ na rusyňskim jazŷku doteper’ absentovaly.

Avtorom dumkŷ i projektu, kotrŷj je pidporenŷj Fondom na pidporu kulturŷ narodnostnŷch menšŷn, je člen i bŷvšŷj predseda O.Z. molodŷ.Rusynŷ Petro Jarinčik. “Mnohŷ členove združiňa usadyly s’a, založŷly vlastnŷ rodynŷ, pryjaly ďitynu, i tak dumka na vŷtvoriňa rusyňskoho obs’ahu v atraktivnim podaňu pro najmenšŷch pryšla avtomatično”, pojasňuje Petro Jarinčik.

V rokach 2022 i 2023 podarylo s’a zanimovaty i publikovaty dvi prypovidky:
“Slon i mŷška”
https://www.youtube.com/watch?v=XunIMxx7BKY
“Jak s’a sŷn naučiv piňazi zarabľaty”
https://www.youtube.com/watch?v=hySfV-d7KDk

Na tvoriňu animovanŷch prypovidok spivpracovav ilustrator i dizajner Jan Ivan. Animovanŷ rusyňskŷ prypovidkŷ možete najty na Youtube kanali molodŷ.Rusynŷ.

АНІМОВАНЫ РУСИНЬСКЫ ПРИПОВІДКЫ

Перед пару рокаму выдало О.З. молоды.Русины комплетну збірку десятьoх ЦД з русиньскыма приповідкамі, зозбераныма по русиньскых селах. Дакотры з них суть уж і в анімованiй пободі.

Розвивати русиньскый язык і вести дiти ку културі є потрібне уж од ранного дiтинства. Дiти самособов інклінують ку приповідкам, і многы з них собі памятають аж до дорослого віку. Днесь суть дiти в каждоденнім контактi з модерныма технолоґіямі, і позераня анімованых приповідок ставать ся частьoв їх штоденной рутіны. I якраз анімованы приповідкы на русиньскiм языку дотеперь абсентовали.

Автором думкы і проєкту, котрый є підпореный Фондом на підпору културы народностных меншын, є член і бывшый председа О.З. молоды.Русины Петро Ярінчік. “Многы членове здружіня усадили ся, заложыли властны родины, прияли дiтину, і так думка на вытворіня русиньского обсягу в атрактівнiм поданю про найменшых пришла автоматічно”, пояснює Петро Ярінчік.

В роках 2022 і 2023 подарило ся занімовати і публіковати дві приповідки:
“Слон і мышка”
https://www.youtube.com/watch?v=XunIMxx7BKY
“Як ся сын научів пінязі зарабляти”
https://www.youtube.com/watch?v=hySfV-d7KDk

На творіню анімованых приповідок співпрацовав ілустратор і дізайнер Ян Iван. Анімованы русиньскы приповідкы можете найти на Youtube каналi молоды.Русины.

Staťa bŷla publikovana u Narodnŷch novynkach infoRUSYN, č. 23-24/2023. Статя была публікована y Народных новинках інфоРУСИН, ч. 23-24/2023.