Avtor: Milan Pilip/Мілан Піліп

Okruhlŷj stil Rusyniv Sloveňska zr’adyv oc’iňiňa Orden Adolfa Dobr’aňskoho. Іnsigniji ordenu bŷly peredanŷ peršŷm oc’inenŷm aktivistam za prynos pro Rusyniv v subotu 22. 2. 2020 na ІІ. Reprezentačnim baľi Rusyniv v Košic’ach.

Orden Adolfa Dobr’aňskoho nese podobu i meno vŷznačnoho rusyňskoho narodnoho budyteľa 19. storoča, kotrŷj bŷv poslanc’om Uhor’skoho sejmu a tŷž spoluosnovateľom Maťic’i sloveňskoj. Orden mať 5 klas, z kotrŷch najvŷsša je 1. klasa – velykochrestyk (veľkokrížnik), ostatňi klasŷ suť: komandor iz zvizdov (komandér s hviezdou), komador (komandér), oficir (dôstojník) i rŷcar’ (rytier). Orden mať i jednu okremu klasu z kolanov (lanckom ordenu). Okruhlŷj stil Rusyniv Sloveňska zr’adyv toto oc’iňiňa na svojim zas’idaňu 8. februara 2020 v Pr’ašovi. Za kancelar’a Ordenu Adolfa Dobr’aňskoho bŷv zvolenŷj Milan Pilip.

Orden Adolfa Dobr’aňskoho s’a uďiľuje fizičnŷm i pravnyc’kŷm osobam, kotrŷ s’a zaslužŷly o rozvytok narodnoj identidŷ, obhajobu prav Rusyniv vŷchoďačich z medžinarodnŷch dokumentiv a pidvŷšovaňa jakosty žŷvota Rusyniv na Sloveňsku i v zahraniču.

Peršŷraz bŷlo toto oc’iňiňa uďilene oc’inenŷm z ruk predsedŷ Okruhloho stola Rusyniv Sloveňska Petra Štefaňaka i kancelar’a ordenu Milana Pilipa dňa 22. februara 2020 na ІІ. Reprezentačnim baľi Rusyniv v Košic’ach. Okruhlŷj stil Rusyniv Sloveňska vŷr’išyv uďilyty Orden Adolfa Dobr’aňskoho 4. klasŷ (dostojnyk) Vasyľovy Jaburovy za vŷznačnŷj prynos v oblasty rozvytku rusyňskoho jazŷka i Anňi Kuzmjakovij za vŷznačnŷj prynos v oblasty rozvytku rusyňskoj drukovanoj presŷ i rozvytku rusyňskoj kulturŷ. Orden Adolfa Dobr’aňskoho 5.klasŷ (rŷcar’) bŷv uďilenŷj Bogdanovy Gambaľovy za vŷznačnŷj prynos v oblasty rusyňskŷch medij.

Vŷznamenanŷ:

doc.PhDr.Vasyľ Jabur, k. n. – je jednŷm iz kodifikatoriv rusyňskoho jazŷka na Sloveňsku. Naležyť id najvŷznačňišŷm rusyňskŷm jazŷkoznateľam, bŷv dyrektorom Іnštitutu rusyňskoho jazŷka pry Rusyňskij obroďi na Sloveňsku, dodnes’ s’a aktivizuje v lingvistic’i i eksterno spolupracuje z Іnštitutom rusyňskoho jazŷka i kulturŷ Pr’ašivskoj univerzitŷ v Pr’ašovi. Je avtorom mnohŷch naučnŷch robot z oblasty gramatikŷ rusyňskoho jazŷka. Orden Adolfa Dobr’aňskoho 4. klasŷ s’a mu uďiľuje za vŷznačnŷj prynos v oblasty rozvytku rusyňskoho jazŷka.

Mgr. Anna Kuzmiakova – rusyňska novynar’ka, perekladateľka i aktivistka. Bŷla členkov peršoj redakciji rusyňskoj periodičnoj presŷ po roc’i 1989, kotra vznykla pry Rusyňskij obroďi na Sloveňsku. Pizňiše osnovala periodikum Іnfo Rusyn. Tŷž brala učasť pry kodifikaciji rusyňskoho jazŷka. Іstŷj čas bŷla taksamo predsedkŷňov Rusyňskoj obrodŷ na Sloveňsku, osnovala c’iloslovac’kŷj deklamator’skŷj konkurz poeziji i prozŷ v rusyňskim jazŷku – Duchnovičiv Pr’ašiv. Orden Adolfa Dobr’aňskoho 4. klasŷ s’a jej uďiľuje za vŷznačnŷj prynos v oblasty rozvytku rusyňskoj drukovanoj presŷ i rozvytku rusyňskoj kulturŷ.

Mgr. Bogdan Gambaľ – rusyňskŷj aktivista z Poľšči s’a aktivizuje v rusyňskim rus’i od druhoj polovynŷ 80. rokiv 20. storoča. Po roc’i 1989 bŷv jedynŷm z tŷch, kotrŷ obnovyly ďijaňa najstaršoj rusyňskoj organizaciji v Poľšči – Ruska Bursa v Gorlic’ach, je jej predsedom. V roc’i 2011 osnovav pry tij organizaciji perše rusyňske internetove radio, kotre vŷsŷlalo 24 hodyn denno – lem.fm. Toto s’a medžičasom distalo do terestrialnoho vŷsylaňa. Popry radiju vznyknuv i spravodajskŷj portal lem.fm. Orden Adolfa Dobr’aňskoho 5. klasŷ s’a mu uďiľuje za vŷznačnŷj prynos v oblasty rusyňskŷch medij.

Русины оцїнёвали особности Орденом Адолфа Добряньского

Округлый стіл Русинів Словеньска зрядив оцїнїня Орден Адолфа Добряньского. Інсіґнії ордену были переданы першым оцїненым актівістам за принос про Русинів в суботу 22. 2. 2020 на ІІ. Репрезентачнім балї Русинів в Кошіцях.

Орден Адолфа Добряньского несе подобу і мено вызначного русиньского народного будителя 19. стороча, котрый быв посланцём Угорьского сейму а тыж сполуоснователём Матїцї словеньской. Орден мать 5 клас, з котрых найвысша є 1. класа – великохрестик (veľkokrížnik), остатнї класы суть: командор із звіздов (komandér s hviezdou), комадор (komandér), офіцір (dôstojník) і рыцарь (rytier). Орден мать і єдну окрему класу з коланов (ланцком ордену). Округлый стіл Русинів Словеньска зрядив тото оцїнїня на своїм засїданю 8. фебруара 2020 в Пряшові. За канцеларя Ордену Адолфа Добряньского быв зволеный Мілан Піліп.

Орден Адолфа Добряньского ся  удїлює  фізічным і правницькым особам, котры ся заслужыли о розвиток народной ідентіды, обгаёбу прав Русинів выходячіх з меджінародных документів а підвышованя якости жывота Русинів на Словеньску і в загранічу.

Першыраз было тото оцїнїня  удїлене оцїненым з рук председы Округлого стола Русинів Словеньска Петра Штефаняка і канцеларя  ордену Мілана Піліпа дня 22. фебруара 2020 на ІІ. Репрезентачнім балї Русинів в Кошіцях. Округлый стіл Русинів Словеньска вырїшив  удїлити Орден Адолфа Добряньского 4. класы (достойник) Василёви Ябурови за вызначный принос в области розвитку русиньского языка і Аннї Кузмяковій за вызначный принос в области розвитку русиньской  друкованой пресы і розвитку русиньской културы. Орден Адолфа Добряньского 5.класы (рыцарь) быв  удїленый Боґданови Ґамбалёви за вызначный принос в области русиньскых медій.

Вызнаменаны:

доц.ПгДр.Василь Ябур, к. н. – є єдным із кодіфікаторів русиньского языка на Словеньску. Належить ід найвызначнїшым русиньскым языкознателям, быв директором Інштітуту русиньского языка при Русиньскій обродї на Словеньску, доднесь ся актівізує в лінґвістіцї і екстерно сполупрацує   з Інштітутом русиньского языка і културы Пряшівской універзіты в Пряшові. Є автором многых научных робот з области ґраматікы русиньского языка. Орден Адолфа Добряньского 4. класы ся му удїлює  за вызначный принос в области розвитку русиньского языка.

Мґр. Анна Кузміакова – русиньска новинарька, перекладателька і актівістка. Была членков першой редакції русиньской періодічной пресы  по роцї 1989, котра взникла при Русиньскій обродї на Словеньску. Пізнїше основала періодікум Інфо Русин. Тыж брала участь при кодіфікації русиньского языка. Істый час была таксамо председкынёв  Русиньской оброды на Словеньску, основала цїлословацькый декламаторьскый конкурз поезії і прозы в русиньскім языку – Духновічів Пряшів. Орден Адолфа Добряньского 4. класы ся єй удїлює  за вызначный принос в области розвитку русиньской  друкованой пресы  і розвитку русиньской културы.

Мґр. Боґдан Ґамбаль – русиньскый актівіста з Польщі ся актівізує в русиньскім русї  од другой половины 80. років 20. стороча. По роцї 1989 быв єдиным з тых, котры обновили дїяня найстаршой русиньской орґанізації в Польщі – Руска Бурса в Ґорліцях, є єй председом. В роцї 2011 основав при тій орґанізації перше русиньске інтернетове радіо, котре высылало 24 годин денно – лем.фм. Тото ся меджічасом дістало до терестріалного высиланя. Попри радію взникнув і справодайскый портал лем.фм. Орден Адолфа Добряньского 5. класы ся му  удїлює за вызначный принос в области русиньскых медій.